Gjykata e Posaçme ka shpallur fajtorë dhe ka dhënë dënimin për Vladimir Lushkajn dhe Pandeli Bozhën, të akuzuar nga SPAK për korrupsion në zgjedhje.
Pandeli Bozha, babai i ish-kandidates për deputete të PSD-së në Fier, Limonera Bozha, u dënua me 1,5 vite burg, por për shkak të gjykimit të shkurtuar, dënimi u ul në 1 vit burgim, i kthyer në shërbim prove për 24 muaj, me kusht që gjatë kësaj periudhe të mos kryejë vepër tjetër penale. Ai u shpall fajtor për veprën penale “Korrupsioni aktiv në zgjedhje”, parashikuar nga neni 328 i Kodit Penal.
Ndërsa Vladimir Lushkaj u shpall fajtor për veprën penale “Korrupsion pasiv në zgjedhje”, sipas nenit 328/b të Kodit Penal. Për të, gjykata vendosi përjashtimin nga dënimi.
Gjykata gjithashtu ka sekuestruar si prova materiale një kartmonedhë prej 2,000 lekësh, e konsideruar shpërblim për veprën penale, si dhe një fletë të ngjashme me fletët e votimit ku emri i kandidatit ishte i shënuar me ngjyrë portokalli. Të dy këto prova do të bëjnë pjesë në dosjen e gjykimit.
