Në Gjykatën e Apelit të Posaçëm u zhvillua seanca gjyqësor për shqyrtimin e ankimit të ish-deputetit socialist Jurgis Çyrbja si dhe dy të pandehurit e tjerë Altin Hajri dhe Ahmet Masha. Gjatë seancës, ish-deputeti kërkoi prishje të vendimit të GJKKO dhe kthim për rigjykim të çështjes penale.
Përmes avokatit të tij, Çyrbja pretendoi se vendimi i GJKKO është i paarsyetuar dhe nuk provohet vepra penale e nxjerrjes së sekretit shtetëror si dhe nuk qëndron akuza e korrupsionit aktiv dhe pasiv në zgjedhje. Altin Hajri që u gjykua në mungesë për shkak se është dënuar me burgim të përjetshëm për rrëmbimin dhe zhdukjen e Jan Prengës kërkoi pafajësi ose ricilësim të veprës penale nga korrupsion në ndikim të paligjshëm. Për pafajësi këmbënguli dhe Ahmet Masha. Vendimi në Apelin e Posaçëm për ta do të shpallet me datë 24 prill. Jurgis Çyrbja u dënua nga Gjykata e Posaçme me 3 vjet burgim për korrupsion në zgjedhje, përkrahje së autorit të krimit dhe nxjerrje së sekretit shtetëror. Dënimi iu reduktua në 2 vite burgim për shkak të gjykimit të shkurtuar dhe tashmë ai e ka shlyer këtë verdikt e ka rifituar lirinë. Altin Hajri u dënua me 3 vite burg, ndërsa Ahmet Masha me 2 vite e gjashtë muaj. Edhe ky i fundit e ka shlyer masën e dënimit. Akuzat ndaj tre të pandehurve u ngritën pas zbërthimit të aplikacionit të koduar Sky ECC.
