Katër muaj më parë, ministrja e Brendshme, Albana Koçiu, dhe drejtori i Policisë së Shtetit, Ilir Proda, dolën me solemnitet para kamerave për të njoftuar ndalimin e përkohshëm të monopatinave elektrike në Tiranë, duke paralajmëruar masa drastike për “sigurinë e qytetarëve”, pasi sipas tyre rastet e aksidenteve kishin shtuar alarmin.
Fill pas deklaratave madhështore, Policia Rrugore “veproi” duke bllokuar rreth 2 mijë monopatina. Pamjet e aksionit u shpërndanë gjerësisht, duke krijuar iluzionin se një goditje serioze ndaj kaosit në rrugë po ndodhte.
Por ndërsa qytetarët prisnin me padurim rregulloren e re që do të sillte “rend dhe disiplinë”, aksioni gradualisht u shua. Sot, pa asnjë rregullore dhe pa kontrolle reale në terren, monopatinat kanë rikthyer lirinë e tyre në rrugët e Tiranës. Çdo qytetar mund të lëvizë sërish pa kufizime, ndërsa policia duket se ka marrë një “pushim të merituar”.
Ndërkohë, monopinat e bllokuara po kthehen, por me problematika. Disa qytetarë nuk i gjejnë më, duke lënë hapësirë për dyshime mbi mënyrën se si janë administruar dhe ruajtur.
Dhe kështu, një aksion që nisi me bujë, kamera dhe solemnitet, ka përfunduar me një mësim për ministren dhe drejtorin e policisë, që nëse do bënin më pak propagandë dhe më shumë veprim në terren, të paktën qytetarët nuk do humbasin monopatinat e tyre.
