Gazetarja Klodiana Lala ka zbardhur detajet nga skema mashtuese përmes call center-ave që vepronin në qendër të Tiranës, me viktima kryesisht shtetas nga Spanja dhe Italia.
Sipas dosjes hetimore, disa shtetas të huaj kanë dëshmuar se janë mashtruar përmes investimeve fiktive. Një prej viktimave ka pohuar se ka humbur deri në 1.5 milionë euro, duke investuar të gjitha kursimet e jetës. Pas këtyre denoncimeve, SPAK i është drejtuar GJKKO-së për leje kontrolli.
Kontrollet u fokusuan në një kullë në qendër të Tiranës, ku ndodhet edhe ambasada izraelite dhe ku zbatohen masa të rrepta sigurie. Për të hyrë në ambientet e dyshuara, agjentët e Byrosë Kombëtare të Hetimit (BKH) kanë përdorur kartat e aksesit të një punonjësi të ndërtesës. Gjatë kontrollit fillestar u konstatua se ambientet ishin bosh dhe pajisjet ishin larguar, duke ngritur dyshime se autorët kishin informacion paraprak për ndërhyrjen e autoriteteve.
Hetimet zbuluan se aktiviteti ishte zhvendosur në një kullë tjetër ngjitur, në katin e pestë, e marrë me qira. Aty, sipas SPAK, personat e përfshirë po tentonin të shkatërronin një pjesë të konsiderueshme të provave. Përmes kamerave të sigurisë u identifikuan automjetet që kishin transportuar pajisjet elektronike nga një ambient në tjetrin.
Gjatë kontrolleve në ambientet e dyta, u sekuestruan pajisje dhe dokumente që tregojnë përmasa të mëdha të aktivitetit kriminal. Sipas përllogaritjeve paraprake, dëmi i shkaktuar nga mashtrimi arrinte nga 8 deri në 12 milionë euro në muaj gjatë periudhës së hetuar, ndërsa dyshimet totale shkojnë deri në rreth 30 milionë euro.
Lala pati kritika dhe për institucionet shqiptare të cikat reaguan vetëm pas denoncimit të emisionit investigativ italian Le Iene, teksa aktiviteti kriminal zhvillohej në qendër të Tiranës, duke hedhur dyshime dhe për përfshirjen e efektivëve të policisë.
