Gazetarja Klodjana Lala rrëfeu mbrëmë në emisionin “Kjo Javë”, kulisat e shkarkimit të kryepolicit Ilir Proda, që publikisht u deklarua si dorëheqje. Ajo tha se shkarkimi i kreut të bluve ishte i paracaktuar dhe i pritshëm, edhe nëse nuk do të kishin ndodhur ngjarjet tek “Vila 31” gjatë protestës së opozitës më 28 shkurt.
Gjithashtu shpjegoi se Proda i kishte bërë shumë dëme policisë dhe njëkohësisht ishte nën verifikim nga SPAK pas skandaleve te AKSHI, akuzave të hedhura ndaj tij për lidhje me eksponentë të krimit dhe veçanërisht Ergys Agasin.
“Proda do të largohej edhe nëse nuk do ishte rasti i sulmit të Vilës 31. Por edhe për shkak të dosjeve që po hetoheshin, çështjes së AKSHI-t ku edhe vartës të tij ishin të përfolur apo implikuar, apo lidhjet e dyshuara me biznesmenët Ergys Agasi dhe Ermal Beqiri, pengmarrjet e ndodhura për shkak të AKSHI-t”, tha gazetarja.
Lala nënvizoi se ka pasur edhe ngjarje më të rënda në Shqipëri, por asnjëherë kryepolici nuk ishte shkarkuar, ndaj komentoi se kjo lëvizje ishte një valvul shkarkimi politike nga ana e kryeministrit Rama.
“Ka pasur ngjarje më të rënda kriminale në Shqipëri, ka ndodhur edhe 21 Janari, por nuk është larguar drejtori i përgjithshëm i Policisë, por mendoj se shkarkimi i Prodës u bë edhe si valvul shkarkimi nga Rama. Kjo edhe pas reagimeve të ambasadave të akredituara në Tiranë që dënuan dhunën, pasi në vilë kishte turistë të huaj dhe në këto rrethana erdhi largimi”, vijoi ajo.
