Kryebashkiaku i Tiranës, Erion Veliaj, i akuzuar për 13 akuza penale, duket se bashkë me ekipin e tij ligjor po shfrytëzon çdo hapësirë me qëllim që ta zvarrisë sa më shumë procesin gjyqësor paraprak në Gjykatën e Posaçme.
Avokatja kryesisht e caktuar nga gjykata për të mbrojtur interesat e Veliajt në mungesë të avokatëve, kërkoi kohë të njihet me aktet dhe leje që ta takonte atë në paraburgim. Por gjykata e rrëzoi kërkesën e saj. Më herët janë shtyrë 9 seanca paraprake, kryesisht për mungesë të avokatëve të kryebashkiakut.
Veliaj dhe bashkëshortja e tij akuzohen për korrupsion dhe përfshirje në një skemë pastrimi parash. Të pandehur janë edhe 28 persona të tjerë, të afërm e bashkëpunëtorë të Ajola Xoxës, biznesmenë, ish-deputetja e PS-së Klotilda Bushka, si dhe OJF e shoqëri tregtare.
Seanca e sotme është duke vijuar, por nuk dihet nëse gjykata do ta marrë vendim për ta kaluar ose jo çështjen për gjykim në themel.
Veliaj ka vijuar me pretendimin se nuk është njohur me dosjen. Gjykata ka vendosur të mbyllë shqyrtimin, duke i konsideruar si abuzive kërkesën e avokatëve dhe mungesë vullneti për të paraqitur prapësimet.
Më vonë, gjykata ka revokuar vendimin, pas kërkesës së avokates kryesisht për të takuar Veliajn në burg dhe për të paraqitur prapësimet, dhe ka shtyrë seancën për më 2 shkurt.
