Zbardhen detaje të reja lidhur me ngjarjen e ndodhur në hyrje të qytetit të Shkodrës, ku dy persona kanë kërcënuar forcat speciale "Shqiponja". Mësohet se njëri nga të shoqëruarit është efektiv i Forcave Kombëtare të Sigurisë (FNSH), i cili në momentin e ngjarjes nuk ndodhej në detyrë.
Sipas burimeve, dy shtetas janë afruar pranë një postoblloku policor dhe kanë kanosur efektivët me fjalët “do t’ju hapim barkun me plumba”, përpara se të largoheshin nga vendngjarja. Menjëherë forcat policore janë vënë në ndjekje të tyre, duke bërë të mundur ndalimin dhe shoqërimin e tyre në ambientet e Policisë së Shkodrës.
Ende nuk dihen motivet që çuan në këtë përplasje verbale me efektivët, ndërkohë që policia ka nisur hetimet dhe po merr në pyetje të ndaluarit për të zbardhur rrethanat e plota të ngjarjes.
