Sic raportoi VNA një ditë më parë, Komisioni për mbrojtjen e gjyqtarëve ka miratuar masa shtesë sigurie për gjyqtaren Irena Gjoka. Përveç mbrojtjes së Gardës së Republikës për gjyqtarët dhe prokurorët e SPAK, asaj do t’i shtohen edhe efektivë të Njësisë së Mbrojtjes së Veçantë.
Në këtë komision bëjnë pjesë Ministria e Brendshme, Ministria e Drejtësisë, përfaqësues të Këshillit të Lartë Gjyqësor, drejtuesi i Gjykatës së Posaçme Erjon Bani, si dhe zyrtarë të Policisë së Shtetit.
Autoritetet nuk kanë bërë publike detaje mbi kërcënimet apo nivelin e rrezikut, duke i mbajtur informacionet sekret, pavarësisht interesit të mediave për sqarime.
Gjyqtarja Gjoka ka qenë edhe më herët nën mbrojtje shtetërore, si për shkak të detyrës në Gjykatën e Posaçme, ashtu edhe për shkak të çështjeve të ndjeshme që ka trajtuar, përfshirë dosjen “Partizani”. Në periudha të ndryshme, asaj i janë vendosur masa sigurie të shtuara për shkak të vlerësimeve për rrezik.
Edhe më herët, figura të tjera të sistemit të drejtësisë kanë përfituar mbrojtje të posaçme shtetërore, përfshirë gjyqtarë dhe prokurorë të përfshirë në çështje të rëndësishme, si dhe raste të dokumentuara kërcënimesh apo sulmesh ndaj tyre.
Aktualisht, një pjesë e konsiderueshme e personave nën mbrojtje shtetërore janë prokurorë të SPAK, si dhe disa prokurorë në Elbasan, disa prej të cilëve janë transferuar për arsye sigurie.
