Banorët e katër fshatrave në zonën e Martaneshit, në bashkinë Bulqizë, shprehin shqetësimin se rrezikojnë të mbeten pa ujë të pijshëm, për shkak të një hidrocentrali që një kompani private po tenton të ndërtojë në zonë.
Ata shprehen për VNA se kompania “Teodori 2003 Sh.P.K” ka nisur punimet për devijimin e rrjedhave natyrore që furnizojnë Liqenin e Sopeve, pa pasur miratimet e nevojshme nga Bashkia Bulqizë apo institucionet qendrore. Ky liqen dhe burimet përreth janë jetike për banorët e fshatrave Mëlcu, Gjon, Qarr dhe Staveç, të cilët përdorin ujin për konsum, bujqësi dhe bagëti.
Banorët kujtojnë se në vitin 2016 punimet u ndaluan pas protestave të komunitetit lokal, por së fundmi kompania është rikthyer dhe ka rifilluar aktivitetin ndërtues në të njëjtën zonë. Ata paralajmërojnë se devijimi i rrjedhave drejt Drinit të Zi, për të furnizuar hidrocentralin e firmës, do të shkaktojë tharjen e burimeve dhe një krizë të rëndë ujore për komunitetin.
Pavarësisht denoncimeve të shumta në institucionet përkatëse, banorët thonë se nuk është marrë asnjë masë për të ndaluar punimet. Ata i bëjnë thirrje qeverisë të ndërhyjë menjëherë dhe të marrë një qëndrim ligjor për të ndaluar, siç e quajnë ata, “kontrabandën ujore”, e cila rrezikon të sjellë konflikt dhe vetëgjyqësi në zonë.
