Kreu i Autoritetit Rrugor Shqiptar, Ami Kozeli, thotë se shkaqet e dëmtimit të urës te “Arrat e Gurrës” dhe bllokimit të aksit Librazhd–Prrenjas janë reshjet intensive të shiut, si dhe erozioni lumor.
Drejtori i ARRSH-së përjashtoi me bindje të plotë mundësinë që dëmtimi të ketë ardhur si pasojë e punimeve që po kryhen sipër urës për Korridorin VIII apo edhe nga gërmimet e kryera në lumë për marrjen e inerteve.
Kozeli gjithashtu tha se, për të zgjidhur bllokimin, do të ndërtohet një rrugë e re alternative përgjatë hekurudhës, në shtratin e lumit Shkumbin, derisa të stabilizohet situata me rrëshqitjet.
Megjithatë, kaosi në juglindje do të vazhdojë me gjasë për disa muaj, duke qenë se kreu i ARRSH-së nuk dha një afat konkret se sa do të zgjasin punimet. Sipas tij, do të kërkojë kohë ndërtimi i një ure të re dhe devijimi i shtratit të lumit, i cili prek trupin e hekurudhës.
