GJKKO ka rrëzuar kërkesën e ish-kryebashkiakut të Himarës, Jorgo Goro, për pezullimin e ekzekutimit të dënimit me burg, duke lënë në fuqi kërkesën e SPAK për rikthimin e tij në qeli.
Sipas vendimit të shpallur sot, trupi gjykues i kryesuar nga gjyqtarja Etleva Deda e cilësoi kërkesën e Goros si të pambështetur në prova dhe në ligj, duke refuzuar shtyrjen e ekzekutimit të vendimit të mëparshëm të dënimit.
Çështja lidhet me një dënim prej 2 vitesh burg, të konfirmuar nga Apeli i Posaçëm, ndërsa Prokuroria kërkon që Goro të rikthehet në burg për të vuajtur pjesën e mbetur të dënimit, e përllogaritur në rreth 6 muaj e 10 ditë. Ish-zyrtari ishte liruar më 29 gusht 2025.
Burime nga procesi bëjnë me dije se Goro pritet ta ankimojë vendimin në shkallën e dytë.
Dënimi lidhet me një çështje tjetërsimi pronash në zonën e Livadhës, ndërsa ai është shpallur fajtor për “shpërdorim detyre”, me dënim të reduktuar për shkak të gjykimit të shkurtuar. Përveç kësaj, ndaj tij është vendosur edhe ndalimi për ushtrimin e funksioneve publike për 5 vite dhe sekuestrimi i një pasurie.
Goro është përballur edhe me një tjetër proces penal për tjetërsim pronash në bregdet përmes dokumenteve të falsifikuara, çështje për të cilën është dënuar më herët me burg.
Vendimi i GJKKO-së:
“Kërkuesi Jorgo Goro me datë 31.03.2026 ka paraqitur pranë Gjykatës kërkesën me objekt: “Pezullimin e ekzekutimit të Vendimit nr. 53, datë 30.07.2025 të Gjykatës së Posaçme të Shkallës së Parë për Korrupsionin dhe Krimin e Organizuar”.
Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Etleva Deda, bazuar në nenin 476 të K.Pr.Penale, me vendimin nr. 258, datë 05.05.2026, vendosi:
Rrëzimin e kërkesës së kërkuesit, të dënuarit Jorgo Goro, me objekt: “Shtyrjen e ekzekutimit të Vendimit nr. 53, datë 30.07.2025 të Gjykatës së Posaçme të Shkallës së Parë për Korrupsionin dhe Krimin e Organizuar”, si të pambështetur në prova dhe ligj.
Shpenzimet gjyqësore i ngarkohen kërkuesit.
Kundër këtij vendimi mund të bëhet ankim brenda afatit ligjor në Gjykatën e Posaçme të Apelit për Korrupsionin dhe Krimin e Organizuar”.
