Një shtetas kosovar, Sabit Mehmeti, 27 vjeç, u arrestua nga Policia Kufitare në Morinë pasi tentoi të kalonte ilegalisht në Shqipëri. Ai ishte i shpallur në kërkim nga autoritetet gjermane për akuzën e “mashtrimit”.
Gjatë kontrolleve të imta në pikat e hyrje-daljeve në territorin shqiptar, Policia Kufitare e Morinës, në bashkëpunim me Drejtorinë Vendore të Policisë Kukës, ndaloi Mehmetin në hyrje të vendit.
Verifikimet e mëtejshme, të mbështetura nga Interpol Tirana dhe informacionet e shkëmbyera me autoritetet gjermane, konfirmuan se ndaj tij ishte lëshuar urdhër-arrest ndërkombëtar nga Gjykata e Mynihut për veprën penale të “mashtrimit”, e cila dënohet me deri në 10 vjet burg.
Interpol Tirana, në koordinim me autoritetet gjermane, po vazhdon procedurat për ekstradimin e 27-vjeçarit drejt Gjermanisë.
