Ish-drejtori i Përgjithshëm i Burgjeve, Agim Ismaili, i cili është i pandehur si pjesë e një grupi kriminal që hakeroi dosjet e SPAK, mbërriti në Gjykatën e Posaçme ku pritet të përballet me akuzat e rënda në seancën paraprake. SPAK e akuzon Ismailin për veprat penale të “përgjimi i paligjshëm i të dhënave kompjuterike”, paragrafi i dytë, të kryer në formën e posaçme të bashkëpunimit, si dhe pjesëmarrje në grup të strukturuar kriminal, “Kryerja e veprave penale nga organizata kriminale dhe grupi i strukturuar kriminal”. Të pandehur janë edhe dy ish-zyrtarët Arnold Rrokaj dhe Zambak Gjoni.
Sipas hetimit të SPAK, i pandehuri Arnold Rrokaj aksesoi në mënyrë të paautorizuar materiale hetimore të Prokurorisë së Posaçme kundër Korrupsionit dhe Krimit të Organizuar, një pjesë e të cilave u dërguan në mënyrë të paligjshme tek të pandehurit Zambak Gjoni dhe Agim Ismaili, të cilët i shpërndanë më pas tek persona të tretë.
Agim Ismaili, pasi u njoh me përmbajtjen e këtyre të dhënave, i shpërndau ato më tej, por edhe kërkoi në mënyrë të vetëdijshme thellimin e përgjimit të paligjshëm të sistemeve të Prokurorisë së Posaçme, duke kërkuar gjetjen e të dhënave për persona të ndryshëm.
