SPAK kërkoi dënimin me 5 vite burgim për ish-deputetin socialist Alqi Bllako për akuzën e korrupsionit në dy raste lidhur me aferën e inceneratorit të Tiranës.
Për shkak të gjykimit të shkurtuar dënimi ulet në 3 vite e 4 muaj, ndërsa si dënim plotësues është kërkuar heqja e së drejtës për të ushtruar funksione publike për 5 vite me radhë.
Bllako ishte dënuar më herët me 4 vite burg që reduktohej 2.8 për shkak të gjykimit të shkurtuar. Por vendimi u prish nga Apeli dhe kthye për rigjykim në GJKKO.
Sipas SPAK, Bllako akuzohet se ka përfituar në mënyrë të tërthortë shumën prej 119,715 eurosh nga Klodian Zoto dhe Mirel Mërtiri, pronarët de facto të inceneratorit të Tiranës për blerjen e paisjeve për aktivitetin tregtar të babait të tij në Ersekë. Episodi i dytë që ish-deputeti akuzohet lidhet me propozimin e Vladimir Bezhanit që të vazhdonte detyrën si këshilltar i jashtëm i ministrit të Mjedisit, Lefter Koka dhe të ndihmonte me konsulencë juridike gjatë kohës kur kishte lindur idea e projektit të zhvillimit të procedurës së dhënies së koncesionit. Për shërbimin e Bezhanit si këshilltar i jashtëm i ministrit të Mjedisit, Bllako akuzohet se i ka kërkuar Klodian Zotos “Integrated Technology Services” sh.p.k, Klodian Zoto një shumë prej vlerës 7.5 milionë lekësh për punësimin fiktiv të Bezhanit.
