Një ditë pas vrasjes së gjyqtarit Astrit Kalaja, Drejtori i Përgjithshëm i Policisë së Shtetit, Ilir Proda, ishte i pranishëm në Gjykatën e Apelit.
Në dalje, atij iu drejtua mikrofoni për të dhënë një prononcim lidhur me ngjarjen dhe praninë e tij aty, por Proda nuk dha asnjë koment dhe asnjë sqarim.
Me hapa të nxituar, Drejtori i Përgjithshëm i Policisë së Shtetit reagoi vetëm me heshtje, në një vend ku kishte dështuar siguria dhe vetë policia që ai drejton.
Kujtojmë se paraditen e sotme, KLGJ përgënjeshtroi deklaratën e ministres së Brendshme, Albana Koçiu, e cila një ditë më parë kishte thënë se “Forcat e Policisë së Shtetit nuk kanë asnjë përgjegjësi për kontrollin e hyrje-daljeve dhe sigurinë brenda godinave të gjykatave.”
Në reagimin e tij, KLGJ shprehet se, në të gjitha gjykatat e Republikës së Shqipërisë, Policia e Shtetit aktualisht ofron shërbimin e saj vetëm me një punonjës në hyrjen kryesore, ku qarkullojnë palët dhe publiku. KLGJ shtoi gjithashtu se ka kërkuar në mënyrë të përsëritur shtimin e forcave të policisë në sallat e gjyqit, por kjo kërkesë është refuzuar.
