Presidenti i Partisë së Lirisë, Ilir Meta, i është drejtuar GJKKO me një kërkesë lidhur me mënyrën e trajtimit të tij si i paraburgosur gjatë seancave gjyqësore. Sipas mbrojtjes, mënyra e vendosjes së tij në sallën e gjyqit shkel nenin 3 dhe nenin 30 të Kushtetutës, si dhe Konventën Evropiane për të Drejtat e Njeriut.
Avokati i tij, Kujtim Cakrani, ka deklaruar se kërkesa synon që Meta të qëndrojë pranë mbrojtjes gjatë gjithë procesit gjyqësor. Sipas tij, mbajtja e të pandehurit në “kafaz me xhama” gjatë seancave cenon prezumimin e pafajësisë dhe vështirëson komunikimin me avokatin.
Kjo është kërkesa e dytë e depozituar në GJKKO për këtë çështje, në prag të nisjes së gjykimit në themel më 27 prill. Ilir Meta është arrestuar më 21 tetor 2024 dhe ndaj tij rëndojnë akuza për korrupsion pasiv, pastrim parash dhe fshehje pasurie, së bashku me ish-bashkëshorten Monika Kryemadhi.
