Pasditen e djeshme, avokati Ulian Barjami u lirua nga qelia, ku qëndroi për tre ditë me urdhër të Oficerëve të Policisë Gjyqësore. Arrestimi i tij u bë pas një kallëzimi nga prokurori Gjergji Ceka, i cili pretendonte se ishte kërcënuar nga Barjami gjatë një seance gjyqësore në Gjykatën e Elbasanit.
Në lidhje me këtë ngjarje, Inspektorati i Lartë i Drejtësisë ka nisur verifikimet me iniciativë për të shqyrtuar ligjshmërinë e veprimeve procedurale që çuan në ndalimin e avokatit. Inspektorë të ILD-së kanë mbërritur sot në Elbasan për të marrë dhe analizuar dokumentacionin lidhur me rastin.
Gjykata e Elbasanit vendosi dje lirimin e menjëhershëm të Barjamit, duke theksuar mungesën e arsyeve ligjore për mbajtjen e tij në izolim. Ky vendim ka nxitur debate dhe shqetësime në komunitetin juridik dhe opinionin publik lidhur me trajtimin e rasteve të tilla.
Ndërkohë, Prokuroria e Elbasanit ka shpallur moskompetencën dhe ka dërguar çështjen në Prokurorinë e Tiranës, duke argumentuar konflikt interesi, pasi padia kundër Barjamit është ngritur nga prokurori Gjergji Ceka, i cili punon në këtë prokurori.
