Bojken Bregovina, përfundoi në pranga në kuadër të operacionit “Skadenca”, pasi dyshohet se fuste në treg ilaçe të skaduara apo kontrabandë.
Nga hetimet rezulton se ai magazinonte në banesë medikamente të ndryshme pa faturë tatimore dhe një pjesë të konsiderueshme të skaduara, të cilat më pas i hidhte në treg duke furnizuar farmacitë e qytetit të Fierit.
Pas informacioneve të siguruara, Gjykata urdhëroi kontrollin e banesës së Bregovinës ku u gjetën gjithsej 4289 kuti me medikamente të ndryshme, ku një sasi e konsiderueshme e tyre ishte e skaduar dhe pjesa tjetër pa faturë tatimore.
Ndaj 42-vjeçarit Bregovina rëndojnë akuzat “Prodhimi dhe tregtimi i barnave dhe pajisjeve mjekësore të falsifikuara ose të rrezikshme për jetën dhe shëndetin”, “Fshehja e të ardhurave”, “Ruajtja ose depozitimi i mallrave kontrabandë” dhe “Tregtimi dhe transportimi i mallrave që janë kontrabandë”.
