Personi në foto është Kamber Sulçaj, autori i dyshuar i vrasjes së shtetasit italian në Tepelenë. Ai është shpallur në kërkim nga Policia, ndërsa dyshimet flasin se vrasja ka ndodhur për shkak të një konflikti.
Policia thotë se nga hetimet rezulton se pas një konflikti verbal për motive të dobëta, 48-vjeçari ka qëlluar me armë në drejtim të viktimës dhe shoqëruesve të tij, si dhe automjeteve të tyre. Për pasojë, humbi jetën shtetasi E. S.
Sekuestrimet e kryera:
Në vendngjarje u sekuestruan automjetet e viktimës dhe të shoqëruesve të tij, si dhe 2 armë gjahu.
Në një stan në zonë të thellë malore midis fshatrave Nivicë dhe Bolenë, u gjetën automjeti dhe veshjet e dyshuara të autorit, si dhe një çantë me dylbi termike, dylbi me rreze infra, mbajtëse arme dhe elektrik dore.
Në banesën e K. S. dhe në banesat e familjarëve të tij në Mesaplik dhe Vlorë, u gjetën dhe u sekuestruan rreth 2 500 000 lekë (lekë dhe euro), 3 armë gjahu me municion, 450 fara të dyshuara Cannabisi dhe 2 kasaforta.
Policia e Gjirokastrës, në bashkëpunim me Policinë e Vlorës dhe strukturat e Policisë Kriminale, vijon punën për kapjen e 48-vjeçarit.
