Një vajzë 22-vjeçare, Jlenia Musella, u vra në Napoli pas një sherri familjar. Ajo u dërgua me urgjencë në spitalin Villa Betania, në lagjen Ponticelli, por mjekët vetëm sa mundën të konstatonin vdekjen e saj. Vajza kishte një plagë të thellë pas shpine dhe shenja dhune në fytyrë.
Për krimin u arrestua vëllai i saj, Giuseppe Musella, 28 vjeç, i cili ishte zhdukur pas ngjarjes dhe më pas u vetëdorëzua në polici gjatë natës. Ai ka pranuar fajësinë. Sipas hetimeve të para, Jlenia fillimisht u godit me grushte dhe shpulla, përpara se të therrej për vdekje.
Shkak i konfliktit, sipas burimeve hetimore, dyshohet të ketë qenë muzika me volum të lartë. Vëllai donte të flinte dhe sherri mes tyre degjeneroi në agresion fatal. Ngjarja mendohet të ketë ndodhur në rrugë, mes britmash që alarmuan banorët e zonës.
Hetimet po zhvillohen nga Policia e Shtetit, nën koordinimin e Prokurorisë së Napolit. Arma e krimit ende nuk është gjetur dhe disa elementë mbeten për t’u sqaruar. Nuk rezulton që Jlenia të kishte bërë denoncime për përndjekje apo kërcënime nga persona të tjerë, çka i ka përqendruar hetimet brenda rrethit familjar.
Familja Musella jeton në lagjen Conocal, një zonë banesash sociale e ndërtuar pas tërmetit të vitit 1980, e njohur për problematika të shumta sociale. Megjithatë, autoritetet përjashtojnë përfshirjen e krimit të organizuar: bëhet fjalë për një tragjedi të ndodhur brenda familjes.
Jashtë spitalit Villa Betania u mblodhën familjarë, miq dhe banorë të zonës, mes dhimbjes dhe dëshpërimit. Situata u mbajt nën kontroll nga forcat e rendit, pa incidente.
“Ajo ishte gjithmonë një diell i ndezur. Është e pabesueshme të mendosh se buzëqeshja e saj u shua kështu”, tregojnë miqtë, duke kujtuar energjinë dhe gëzimin që Jlenia përcillte, edhe përmes rrjeteve sociale ku ishte shumë aktive.
Kryetari i Bashkisë së Napolit, Gaetano Manfredi, shprehu ngushëllimet e tij për familjen dhe theksoi angazhimin e institucioneve për të luftuar varfërinë dhe izolimin social në zonat më të vështira të qytetit. “Një tragjedi e rëndë”, e cilësoi ngjarjen edhe prefekti i Napolit, Michele di Bari, duke siguruar se drejtësia po vepron me shpejtësi./ANSA
