Gilmando Dani dhe Muçi Shaljani sapo kishin mbërritur në aeroportin e Rinasit. Sipas të dhënave të siguruara nga sistemi TIMS, të dy kanë mbërritur mesditë me një fluturim të linjës direkte nga Barcelona në Rinas.
Pasi kanë marrë makinën e parkuar në parkingun e Rinasit, të dy kanë hypur në makinë, Muçi Shaljani alias Sheqeri, agjent i Agjencisë së Mbikëqyrjes Policore, si dhe Gilmando Dani i ulur në vendin e parë të makinës që drejtohej nga agjenti i AMP-së. Makina ishte në emër të Elvis Kosovës, i njohur si Visi i garave.
Sapo makina doli tek rrethi i Rinasit, një makinë në ndjekje të tij për disa metra është vendosur nga një automjet tjetër “Toyota” me targa greke dhe prej andej është qëlluar në drejtim të tyre. Kur makina me të cilën udhëtonte Dani është ndaluar, njëri nga ekzekutorët ka dalë nga “Toyota” dhe i është afruar 47-vjeçarit duke e qëlluar për vdekje. Pra, toga e pushkatimit e donte me çdo kusht të vrarë Danin.
Pasi makina e vrasësve largohet me shpejtësi drejt Urës së Gjolës, policia dhe kalimtarë rastësorë thyejnë xhamin e makinës. Brenda saj, Dani kishte ndërruar jetë, ndërsa agjenti i AMP-së u transportua për në spitalin e Traumës në Tiranë, ku ndodhet në gjendje të rëndë shëndetësore.
Automjeti i vrasësve u gjet i djegur në fshatin Halil dhe brenda tij u konstatuan 4 armë zjarri që dyshohet se janë përdorur në ngjarje.
