Detaje të reja kanë dalë në dritë lidhur me atentatin mafioz të 11 nëntorit pranë Rinasit, ku mbetën të vrarë Gilmando Dani dhe oficeri i AMP-së, Muçi Shaljani, i cili ndërroi jetë pak ditë më pas në spital nga plagët e marra.
Bëhet e ditur se ekspertiza balistike e armëve të gjetura në automjetin e djegur të autorëve ka konfirmuar se ato nuk janë përdorur në ngjarje të tjera kriminale. Kjo gjetje përjashton një nga pistat fillestare të hetimit, sipas së cilës arsenal i armëve mund të ishte siguruar në banesën e zbuluar pak orë pas atentatit në fshatin Zall, në pronësi të Ylli Zallës, i shpallur tashmë në kërkim.
Ndërkohë, personi i shoqëruar mbrëmjen e së martës, 9 dhjetor, në lidhje me ngjarjen, është lënë i lirë pas marrjes në pyetje. 35-vjeçari me inicialet B. Xh., banor i fshatit Halil, zonë ku u zbulua e djegur “Toyota”-ja e autorëve, ka deklaruar se në momentin e ngjarjes nuk ndodhej në banesë dhe se nuk ka dijeni për lëvizjet e autorëve. Ai u thirr për të dhënë shpjegime për shkak të një dënimi të mëparshëm për vjedhje me dhunë.
Një muaj pas atentatit, hetimet vijojnë të përqendrohen te marrja në pyetje e personave që mund të kenë informacion të vlefshëm, por deri më tani nuk ka autorë apo porositës të identifikuar. Dani dhe Shaljani sapo ishin kthyer nga një udhëtim në Barcelonë, kur u pritën në rrethrrotullimin e Rinasit nga atentatorët që i ekzekutuan me breshëri armësh.
