Pas atentatit të ndodhur dje në rrethrrotullimin pranë aeroportit “Nënë Tereza”, ku mbeti i vrarë Gilmando Dano dhe u plagos Muçi Shaljani, agjent i Agjencisë së Mbikëqyrjes Policore (AMP), kjo e fundit ka ndaluar dy punonjës policie të dyshuar për falsifikim dokumentesh dhe shpërdorim detyre.
Në njoftimin zyrtar të AMP-së thuhet se janë ndaluar Nënkomisari Bruno Cara, specialist për hetimin e krimeve, dhe Inspektori Ashim Zajmi, nën/specialist i policimit në komunitet pranë Komisariatit Nr. 3, Tiranë.
Të dy dyshohen se kanë përpiluar në bashkëpunim Vërtetimin e Besueshmërisë për shtetasin M.Sh. (Muçi Shaljani), pa pasqyruar në dokument të dhëna që përbënin shkak për cenimin e kushteve të sigurisë. Ky veprim, sipas AMP-së, ka bërë të mundur punësimin e tij në institucion, në kundërshtim me ligjin “Për Policinë e Shtetit” dhe aktet që rregullojnë veprimtarinë e agjencive ligjzbatuese.
Hetimet e deritanishme kanë konstatuar edhe shkelje të procedurave ligjore në procesin e rekrutimit të Shaljanit, ndaj praktika dokumentare i është dërguar Prokurorisë së Tiranës në formën e kallëzimit penal, për përcaktimin e përgjegjësive ligjore të personave të përfshirë.
Sipas AMP-së, hetimet po vijojnë për sqarimin e plotë të procedurave të ndjekura dhe përfshirjen e mundshme të zyrtarëve të tjerë në këtë rast që lidhet me atentatin mafioz të së martës në Rinas.
