Në Gjykatën e Posaçme në procesin penal ndaj të pandehurve Amar Shkëmbi dhe Bledar Polovina, të akuzuar për atentatin tek mbikalimi i Shkozetit më 1 nëntor 2019 me 1 të vrarë dhe dy të plagosur, dëshmoi shtetasi A.M. Dëshmitari është babai i të miturve që gjetën në fshatin Shkafanë makinën e braktisur të autorëve të atentatit mafioz, ku mbetën të plagosur prokurori i Durrësit në atë kohë Arjan Ndoj dhe miku i tij Aleksandër Laho, i njohur si Rrumi, ndërsa u vra shoferi Andi Maloku. Mbi provat e gjetura në automjet u zbuluan dhe gjurmët e Redjan Rrajës, që veproi si ekzekutor në ngjarje dhe është dënuar me burgim të përjetshëm.
“2 nga fëmijët kanë ikur nga Shqipëria, janë jashtë në kamp. Do marr gruan dhe fëmijën tjetër, do largohem edhe unë. Më kanë dhunuar edhe në polici, një ditë tjetër më goditën me levë pas koke. Në fshat më thonë spiun i SPAK-ut, më kanë ndjekur edhe makina të shtrenjta nga pas. Nuk kam siguri këtu, s’kam siguri se mund të ha ndonjë plumb”, deklaroi dëshmitari.
Gjatë seancës, gjyqtari Paulin Cera e orientoi dëshmitarin të bënte kallëzim në SPAK lidhur me kërcënimet që ai pretendonte se kishte marrë, ndërsa prokurori Adnand Xholi deklaroi se do t’i vinte në dispozicion hetuesit e BKH për të ndjekur shqetësimet e tij. Dëshmitari rikonfirmoi se kishte vendosur të largohej nga Shqipëria.
Për organizimin e atentatit mafioz është kërkuar dënimi me burg përjetë për kreun e grupit kriminal, Plarent Dervishaj.
