Një shtetas brazilian i shpallur në kërkim ndërkombëtar për vrasje është arrestuar në Aeroportin Ndërkombëtar të Rinasit, gjatë tentativës për të hyrë në territorin shqiptar.
Sipas njoftimit zyrtar, shërbimet e Policisë Kufitare të Rinasit ndaluan dhe arrestuan provizorisht Alex Fernado Vioti, 51 vjeç, banues në Itali. Gjatë verifikimeve rutinë në hyrje/dalje të vendit, rezultoi se ndaj tij ishte lëshuar një urdhër arresti ndërkombëtar nga autoritetet braziliane.
Gjykata e Goiania në Brazil e ka dënuar Viotin në vitin 2023 me 8 vite burgim, për veprën penale "Vrasja".
Interpol Tirana ka nisur procedurat dhe po bashkëpunon ngushtësisht me Interpol Brasilia për finalizimin e ekstradimit të 51-vjeçarit drejt Brazilit.
Autoritetet shqiptare theksojnë se kontrollet në kufi janë intensifikuar për të goditur veprimtaritë e paligjshme dhe për të ndaluar personat në kërkim ndërkombëtar.
