Një adoleshent shqiptar, Manuel Leti, 16 vjeç, nxënës i informatikës në Qendrën e Formimit Profesional “Zanardelli” në Darfo, ka humbur jetën në mënyrë tragjike pas një aksidenti rrugor. Sipas mediave italiane, Manuel po udhëtonte me motorin e tij tip “KTM Duke 125” në rrugën “4 Nëntori”, kur në kryqëzimin me rrugën “Caduti della Resistenza”, u përplas me pjesën e përparme të një automjeti Audi, të cilin e drejtonte një 44-vjeçar. Përplasja, megjithëse e konsideruar fillimisht e lehtë, rezultoi fatale, pasi motori humbi kontrollin dhe u përplas me një shtyllë ndriçimi.
Manuel ra me forcë në asfalt dhe, fatkeqësisht, përdorimi i kaskës nuk mjaftoi për të shmangur fatalitetin. Një mik i tij, që po e ndiqte me një tjetër motor, ishte dëshmitar i ngjarjes së rëndë. Pavarësisht ndërhyrjes së menjëhershme të ambulancave dhe helikopterit të emergjencës Areu, përpjekjet për ta reanimuar rezultuan të kota, pasi dëmtimet në kraharor dhe bark ishin tepër të rënda.
16-vjeçari, i lindur në Itali nga prindër me origjinë shqiptare, ishte rritur në Pian Camuno dhe prej disa muajsh ishte zhvendosur në Artogne. Manuel kishte edhe një motër më të madhe dhe një vëlla më të vogël.
