Gjykata e Sarandës caktoi masën e sigurisë “arrest në burg” për Alban Muçon, i cili mashtronte qytetarët dhe u premtonte punësim në institucionet e drejtësisë, teksa prezantohej si funksionar i lartë Prokurorisë së Posaçme.
Ndaj tij rëndon akuza e “mashtrimit dhe përvetësimit të titullit”. Hetimet kanë zbuluar se Alban Muço ka mashtruar disa të rinj në Sarandë, duke u premtuar punësim në institucione të drejtësisë me pagë të majme deri në 2800 euro si dhe dieta e shpenzimet të tjera.
Avokati i tij, Armand Çaushi, kërkoi caktimin e një masë me të lehtë sigurie, duke pretenduar se klienti i tij nuk përbën rrezik të largohet apo të kryejë vepra të tjera penale. Ai tha se Muço po jetonte një fazë deluzionale, që mendon se është prokuror.
Pavarësisht pretendimeve të mbrojtjes, gjykata vendosi ta lërë atë prapa hekurave.
