Gjykata e Elbasanit liroi 16 të arrestuarit e operacionit “Metalurgjiku”, duke konsideruar arrestin si të paligjshëm.
Seanca e zhvilluar në Gjykatën e Elbasanit zgjati më shumë se shtatë orë, për shkak të numrit të madh të personave të përfshirë, por edhe pranisë së shtetasve të huaj për të cilët ishte e nevojshme pranimi i përkthyesve të licencuar.
Gjatë operacionit, 16 persona, prej të cilëve 9 të huaj, u arrestuan fillimisht për kryerjen e veprave penale kundër mjedisit. Arrestimet u kryen pas ankesave të banorëve të zonës së Bradasheshit, që ngritën shqetësime për ndotje mjedisore.
Policia dhe Prokuroria e Elbasanit, në bashkëpunim me Inspektoratin Kombëtar të Mbrojtjes së Territorit, zbuluan se dy kompani, CCAlb dhe GSA Ferrokrom, të cilat operonin në zonën e ish-Metalurgjikut në sektorin e ferro-kromit dhe ferrolezhave, kishin shkelur ligjin mjedisor duke ndotur ajrin, ujërat dhe tokën.
Nga kontrolli në terren u konstatuan shkelje të rëndësishme: kompania GSA Ferrokrom nuk trajtonte dhe nuk dërgonte mbetjet e hirit nga sistemi i pluhur kapjes tek operatorë të licencuar, ndërsa CCAlb nuk respektonte kriteret për riciklimin dhe asgjësimin e mbetjeve të baterive.
Si pasojë, aktiviteti i të dy kompanive u pezullua dhe u gjobitën me 10 milionë lekë (CCAlb) dhe 3 milionë lekë (GSA Ferrokrom). Në arrest përveç administratorëve Ilir Londo dhe Ergis Flaga, përfunduan edhe drejtorë prodhimi, inxhinierë, drejtues teknik, përgjegjës turni, operator furre dhe punonjës të tjerë.
Gjithashtu, nën përgjegjësi penale u vu shefi i Sektorit të Mjedisit në Bashkinë e Elbasanit për veprat penale “Shpërdorimi i detyrës” dhe “Falsifikimi i dokumenteve”.
