Në kuadër të një hetimi të përbashkët me autoritetet italiane, SPAK dhe Byroja Kombëtare e Hetimit, në bashkëpunim me Policinë e Shtetit, kanë kryer kontrolle në disa ambiente të marra me qira në Tiranë. Kontrollimet u fokusuan në gjetjen e materialeve dhe sendeve të tjera të lidhura me një hetim për mashtrim përmes call center-ave.
Nga operacioni rezultojnë 10 persona të arrestuar, ndërsa dy të tjerë, pronarët e qendrave të thirrjeve, janë shpallur në kërkim.
Hetimi nisi pas denoncimeve të publikuara në emisionin italian “Le Iene”. Gazetari Luigi Pelazza, pas disa javësh hetimesh, ka zbuluar një skemë të organizuar që vepron në disa vende, përfshirë Shqipërinë, dhe ka mashtruar dhe vjedhur miliona euro nga mijëra viktima në të gjithë botën.
Skema bazohet në telefonata që premtojnë fitime të shpejta dhe platforma dixhitale që simulojnë investime të rreme. Sipas burimeve të brendshme, hetuesit kanë identifikuar edhe nivelet më të larta të organizatës, përfshirë personin përgjegjës për rekrutimin e stafit në call centerat shqiptare.
Gazetari italian tregoi se operatorët kërkonin një investim fillestar prej 250 eurosh për të investuar në aksionet e kompanisë Finivest, të pretenduara si të garantuara nga shteti italian. Pasi viktimat pranonin të investonin, u jepet akses në një websajt ku u shfaqej një shumë fiktive prej 50 mijë eurosh. Kur viktimat përpiqeshin të tërhiqnin paratë, u kërkohej të bënin transfertë të re, duke u marrë kështu shumën e investuar dhe shumëfishin e saj, që kurrë nuk mund të kthehej.
Autoritetet italiane kanë gjurmuar personat përgjegjës deri në Shqipëri, çka solli edhe ndërhyrjen e SPAK dhe Policisë së Shtetit.
