Në kuadër të hetimeve për rastin e helmimit të studentëve në Akademia e Sigurisë, Prokuroria e Tiranës ka thirrur për të martën për deklarime kreun e AKU-së, Ersid Hasanllari. Ai pritet të pyetet mbi kontrollet e mëhershme të kryera në institucion.
Një ditë më pas, të mërkurën, për deklarime do të paraqiten edhe drejtoresha e ISHP-së si dhe kreu i Kujdesit Shëndetësor të Njësisë Vendore Tiranë.
Më herët u raportua se AKU nuk ka dorëzuar ende në Prokurorinë e Tiranës dokumentacionin dhe rezultatet e kërkuara për rastin, pavarësisht një kërkese të mëparshme nga organi i akuzës. Hetuesit po verifikojnë nëse janë kryer kontrolle paraprake dhe çfarë rezultatesh kanë dhënë analizat mbi produktet ushqimore të konsumuara në akademi.
Ndërkohë, prokuroria është në pritje të akt-ekspertizës nga Mjekësia Ligjore, e cila pritet të përcaktojë përfundimisht shkaqet e helmimit.
Një ditë më parë, AKU njoftoi se analizat laboratorike kanë zbuluar praninë e Escherichia coli dhe stafilokokut në mostrat e makaronave të marra në kuzhinën e Akademisë së Sigurisë në Sauk.
