Janë zbardhur gjashtë raste vjedhjesh të kryera gjatë muajve të fundit në Memaliaj dhe Përmet nga një duo kriminale në dukje e pazakontë: nënë e bir!
Shërbimet e Komisariatit të Policisë Tepelenë, në bashkëpunim me Stacionin e Policisë Memaliaj, kanë finalizuar me sukses një operacion të koduar për goditjen e veprimtarive kriminale në fushën e vjedhjes së pronës.
Në pranga ka rënë shtetasja Z. U., 67 vjeçe, banuese në Belsh, ndërsa në kërkim është shpallur djali i saj, L. U., 36 vjeç, po ashtu nga Belshi.
Si vepronin?
Hetimet kanë zbuluar se dyshja kriminale vepronte në mënyrë të organizuar, duke studiuar më parë objektivat – banesa, lokale dhe madje edhe objekte kulti – e më pas kryenin vjedhjet në orët e vona të natës. Ata përdornin mjete të forta si leva dhe kaçavida për të hyrë në ambiente të ndryshme dhe për të marrë para apo sende me vlerë.
Rastet e zbardhura të vjedhjeve:
Në 4 maj fshati Vasjar, Memaliaj – u vodhën bizhuteri floriri dhe para nga banesa e shtetasit P. Ll.
Në 10 korrik fshati Krahës – vjedhje në një objekt kulti.
Në 7 gusht fshati Sukë, Përmet – sërish vjedhje në objekt kulti.
Në 23 gusht fshati Petran, Përmet – u vodhën para nga lokali i shtetasit A. L.
Në 4 shtator Memaliaj – dy vjedhje të tjera: një në objekt kulti dhe një në lokal.
Në cilësinë e provës materiale janë sekuestruar:
1 automjet
1 celular
Mjete të përdorura për vjedhje (levë dhe kaçavida)
Policia vijon punën për kapjen e 36-vjeçarit, ndërsa hetimet janë ende në zhvillim për zbardhjen e rasteve të tjera të mundshme që mund të lidhen me këtë grup.
Materialet i janë referuar Prokurorisë së Gjirokastrës, për veprime të mëtejshme procedurale, për veprën penale “Vjedhja”, e kryer në bashkëpunim.
