Çështja e hakerimit të bujshëm të sistemeve kompjuterike të Prokurorisë së Posaçme (SPAK) ka mbërritur në dyert e Gjykatës Kushtetuese. Ish-zyrtari i burgjeve, Zambak Gjoni, i arrestuar si pjesë e një "grupi të strukturuar kriminal", ka ankimuar vendimet e gjykatave më të ulëta që e mbajnë atë në qeli prej marsit të vitit të kaluar.
Sipas dhënave të fundit, Gjoni kërkon shfuqizimin e vendimit të Gjykatës së Lartë, i cili nuk pranoi rekursin e tij kundër masës së sigurimit "arrest në burg". Padia në Kushtetuese, e cila ka si relator gjyqtarin Ilir Toska, pretendon se mbajtja e tij në izolim është në kundërshtim me Kushtetutën e Republikës së Shqipërisë.
Zambak Gjoni u arrestua në mars të vitit 2025 së bashku me Arnold Rrokajn, nën akuzën se kanë ndërhyrë në mënyrë të paautorizuar në postat elektronike të tre prokurorëve të SPAK: Behar Dibra, Enkeleida Millonai dhe Elida Kaçkini.
Sipas hetimeve të SPAK:
Arnold Rrokaj dyshohet se ka ekzekutuar teknikisht ndërhyrjen.
Zambak Gjoni akuzohet se ka marrë informacionet e vjedhura dhe i ka shpërndarë te persona të tretë, mes të cilëve edhe ish-kreu i Burgjeve, Agim Ismaili.
Synimi i grupit dyshohej se ishte marrja e të dhënave mbi dosje sensitive hetimore.
Vetëm pak ditë më parë, më 6 mars 2026, Gjykata e Posaçme (GJKKO) vendosi kalimin e dosjes për gjykim. Ndërsa Agim Ismaili do të përballet me drejtësinë në gjendje të lirë, Gjoni dhe Rrokaj mbeten në burg, duke pritur tashmë fjalën e fundit të Gjykatës Kushtetuese mbi ligjshmërinë e qëndrimit të tyre pas hekurave.
