Gjykata e Posaçme kaloi për gjykim dosjen penale ndaj tre të akuzuarve për hakerimin e sistemeve të SPAK.
I pandehuri kryesor është ish-drejtori i Përgjithshëm i Burgjeve, Agim Ismaili, i cili bashkëpunoi me dy ish-zyrtarët Zambak Gjoni dhe Arnold Rrokaj.
Gjykata ka vlerësuar se hetimet e SPAK për ta janë të plota dhe për rrjedhojë e ka kaluar dosjen për gjykim.
Të pandehurit do të gjykohen për akuzat “Hyrja e paautorizuar kompjuterike”, paragrafi i dytë dhe “Përgjimi i paligjshëm i të dhënave kompjuterike”, paragrafi i dytë, të kryera në formën e posaçme të bashkëpunimit atë të grupit të strukturuar kriminal, si dhe për veprat penale “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Gjoni dhe Rrokaj do të gjykohen me procedurë të përshpejtuar, ndërsa Agim Ismaili do të gjykohet veçmas në një proces të zakonshëm.
Nga hetimet rezultoi se i pandehuri Arnold Rrokaj ka aksesuar në mënyrë të paautorizuar materiale hetimore të SPAK, një pjesë e të cilave u dërguan në mënyrë të paligjshme tek të pandehurit Zambak Gjoni dhe Agim Ismaili, të cilët i kanë shpërndarë më pas tek persona të tretë.
