Grumbujt e mbeturinave nuk janë më vetëm një problem estetik i rrugëve të Tiranës, por një kërcënim serioz shëndetësor brenda Qendrës Spitalore Universitare “Nënë Tereza”. Në territorin ku qytetarët shkojnë për t’u shëruar, sot rrezikojnë të infektohen.
Me vetëm një mjet pastrimi që funksionon sporadikisht dhe një punëtor të vetëm, situata është jashtë çdo kontrolli. Plehrat qëndrojnë për orë e ditë të tëra pa u larguar, në një periudhë kur fluksi i pacientëve nga virozat është në rritje, duke shtuar rrezikun për përhapjen e infeksioneve.
Mjekët infeksionistë paralajmërojnë se mbeturinat spitalore janë burim i drejtpërdrejtë i sëmundjeve, por në QSUT kjo duket se injorohet. Neglizhenca është e dukshme jo vetëm nga shërbimet e pastrimit, por edhe nga vetë stafi sanitar, ku mbetjet hidhen pa kriter dhe pa asnjë standard sigurie.
Në spitalin më të madh në vend, papërgjegjshmëria po kthehet në rrezik publik, ndërsa askush nuk mban përgjegjësi.
