Një konflikt brenda familjes ka përfunduar me plagosje dhe arrestim në zonën e Labinot Fushës, në qarkun e Elbasanit. Një 35-vjeçar është vënë në pranga nga Policia, pasi dyshohet se ka goditur me thikë vëllanë e tij.
Ngjarja u zbulua pas njoftimit se në Spitalin Rajonal Elbasan ishte paraqitur për ndihmë mjekësore një 46-vjeçar, i cili kishte pësuar dëmtime në dorë, të shkaktuara nga një mjet prerës. Menjëherë pas marrjes së informacionit, shërbimet e Komisariatit të Policisë Elbasan nisën veprimet hetimore për zbardhjen e rrethanave të rastit.
Si rezultat i hetimeve të shpejta, u arrestua në flagrancë autori i dyshuar, shtetasi B. H., 35 vjeç, banues në fshatin Labinot Fushë. Sipas Policisë, ai dyshohet se ka goditur me thikë vëllanë e tij, shtetasin A. A., 46 vjeç, për motive të dobëta. I dëmtuari ndodhet jashtë rrezikut për jetën.
