Goditet një tjetër rast i trafikimit të armëve, në pranga përfundon një shtetas nga Kosova.
Në kuadër të operacionit policor i koduar “Barriera” u sekuestruan 12 armë zjarri pistoleta dhe municion luftarak, që dyshohet se do të shiteshin në Fresk.
“Në kuadër të këtij operacioni u bë arrestimi në flagrancë i shtetasit D. B., 27 vjeç, banues në Kosovë.
Gjatë operacionit në dalje të Unazës së Madhe, pranë mbikalimit të Tufinës, shërbimet e Policisë kanë lokalizuar mjetin e dyshuar dhe kanë ndërhyrë duke e ndaluar atë.
Gjatë kontrollit të automjetit tip “Volkswagen” me drejtues 27-vjeçarin, konkretisht nën kofanon e tij janë gjetur dhe sekuestruar 10 armë zjarri pistoleta Glock me municion luftarak”, njoftoi policia.
Po në kuadër të këtij procedimi janë sekuestruar edhe dy pistoleta të tjera Glock, gjithsej 12 pistoleta.
“Nga hetimet ka rezultuar se 27-vjeçari do t’i shiste armët në zonën e Freskut”, thonë hetuesit.
Në rrjetin e trafikut të armëve dyshohet se janë të përfshirë edhe shtetas të tjerë.
