Gjykata e Posaçme urdhëroi SPAK-un t’i vërë në dispozicion fashikujt e dosjes hetimore të pandehurit Ilir Meta, ish-president i Republikës. Gjatë seancës së së premtes, Meta pretendoi se nuk është njohur me aktet, për shkak se ato janë në formë elektronike dhe ai është në pamundësi t’i aksesojë në paraburgim. Gjykata vendosi, mbi bazën e kësaj kërkese, ta shtyjë seancën për në datën 22 dhjetor dhe ta urdhërojë SPAK-un që brenda javës t’ia vërë aktet në dispozicion. Ilir Meta, ish-bashkëshortja e tij, Monika Kryemadhi, dhe tre bashkëpunëtorë të tjerë akuzohen për korrupsion, pastrim parash dhe fshehje pasurie. Ish-presidenti mbahet në paraburgim prej 21 tetorit 2024.
Meta: Po më shkelen të drejtat kushtetuese, duke mos më dhënë aktet, duke mos më vendosur asnjë provë që unë të bëj prapësimet. Po mbahem në paraburgim pa të drejtë sepse nuk kam asnjë mundësi reale të prish provat, të intimidoj dëshmitarët, s’kam publik dhe asnjë mundësi reale të prish provat.
