Kolegjet e Bashkuara të Gjykatës së Lartë po shqyrtojnë sot një çështje të rëndësishme që lidhet me ndryshimin e praktikës për caktimin e masave të sigurisë. Nisma është ndërmarrë nga kryetari i Gjykatës së Lartë, Sokol Sadushi, pas vënies në lëvizje nga një shtetas i akuzuar për çështje droge.
Lëvizja është shoqëruar me kritika dhe dyshime, pasi është ngritur shqetësimi se një ndryshim i praktikës mund të ndikojë në mënyrën se si caktohen masat e sigurisë dhe potencialisht të sjellë lirimin e zyrtarëve të lartë të akuzuar nga SPAK për korrupsion, mes tyre edhe kryebashkiakun e Tiranës, Erion Veliaj.
Gjatë seancës, prokurori Arqile Kocca u shpreh se çështja e sotme përfshin dy elemente kryesore: njësimin e praktikës gjyqësore dhe shqyrtimin e çështjes konkrete.
“Çështja e sotme mbart problematika që lidhen me dy pikat kryesore: së pari me njësimin e praktikës dhe së dyti me çështjen konkrete. Ne kërkojmë që seanca të zhvillohet me dyer të mbyllura për shkak të problematikave që ka çështja. Përsa i përket njësimit të praktikës, ajo mund të jetë e hapur aq sa lejohet, por për çështjen konkrete të mos jenë të pranishme mediat”, tha Kocca.
Në të njëjtën linjë u shpreh edhe avokati Luan Hasneziri, i cili deklaroi se është dakord që diskutimi për çështjen konkrete të zhvillohet me dyer të mbyllura.
Pas diskutimeve, Kolegjet e Bashkuara vendosën që seanca gjyqësore të zhvillohet në dy faza. Faza e parë do të lidhet me njësimin e praktikës gjyqësore për masat e sigurisë dhe do të zhvillohet në mënyrë të hapur. Ndërsa pjesa e dytë, ku do të trajtohet rasti konkret që ka sjellë këtë çështje në Gjykatën e Lartë, do të zhvillohet me dyer të mbyllura.
Vendimi që pritet nga Kolegjet e Bashkuara për njësimin e praktikës mund të ketë ndikim të gjerë në mënyrën se si do të aplikohen masat e sigurisë në sistemin e drejtësisë në të ardhmen.
