Gjykata e Lartë ka vendosur të lërë në fuqi vendimin e Apelit të Posaçëm për dënimin me burgim të përjetshëm të Xhulian Hoxhës dhe 16 vite burg për Euglen Halilin, në lidhje me vrasjen e Emiljano Ramazanit dhe Regis Runajt.
Të dënuarit kishin paraqitur rekurs në Gjykatën e Lartë, duke kërkuar prishjen e vendimit të dhënë nga Apeli i Posaçëm më 8 prill 2024. Megjithatë, shkalla e tretë e gjyqësorit vendosi të rrëzojë kërkesën e tyre dhe të lërë në fuqi vendimin e mëparshëm, duke vulosur kështu dënimin përfundimtar të dy të pandehurve.
Ngjarja për të cilën ata u dënuan ndodhi në korrik të vitit 2020 në Elbasan, ku Emiljano Ramazani u vra më 20 korrik 2020, ndërsa Regis Runaj u gjet i vrarë me thikë më 29 korrik të po atij viti, në lagjen “Emin Matraxhiu”, pranë varrezave të qytetit.
Vendimi i Gjykatës së Lartë shënon mbylljen përfundimtare të procesit gjyqësor, duke konfirmuar dënimet e rënda për autorët e ngjarjeve që tronditën Elbasanin në verën e vitit 2020.
