Gjykata e Posaçme i komunikoi masën e sigurisë “arrest me burg” Aleks Ndrekës, i njohur si “Leksi i Druve”, pas ekstradimit nga Italia. Aleks Ndreka ishte shpallur në kërkim me urdhër të SPAK në kuadër të dosjes “Metamorfoza” për akuzën e sigurimit të kushteve për të kryer vrasjen e 3 personave në 2017.
“Aleks Ndreka alias Aleks Doda akuzohet se pasi ka siguruar informacion mbi vendndodhjen e 3 shtetasve shqiptarë, ka organizuar dhe ka koordinuar bashkëpunëtorët e tij, duke organizuar prita, me qëllim vrasjen e tyre”, thuhet në dosje.
I njohur me nofkën “Leksi i Druve”, ai rezulton në përplasje të forta me ish-deputetin socialist Arben Ndoka, edhe ky në kërkim ndërkombëtar.
Nga hetimet rezulton se Ndoka bashkë me nipin e tij, Samuel Ndokën, dhëndrrin e tij, Arjan Tukun dhe Vinsent Tuku kanë tentuar vrasjen e Ndrekës.
“Të pandehurit Arben Ndoka dhe Arian Tuku, në bashkëpunim me anëtarë të tjerë të këtij grupi, të pandehurit Samuel Ndoka, Vinçens Tuku, si dhe me shtetas të tjerë të paidentifikuar, kanë planifikuar vrasjen e shtetasit Aleks Ndreka (alias Aleksandër Deda), më 1.12.2020, e mbetur në tentativë. Aleks Ndreka mori plagë të lehta, pasi u qëllua me armë zjarri nga një automjet”, thekson SPAK.
