Gjykata e Posaçme dënoi me 2 vite burgim Jorgo Goron, ish-kryetar i Bashkisë së Himarës. Për shkak të gjykimit të shkurtuar, ai do të vuajë 1 vit e 4 muaj heqje lirie. Gjykata vendosi gjithashtu si dënim plotësues ndalimin e ushtrimit të funksioneve publike për një periudhë 5-vjeçare.
Trupa gjykuese dënoi me 1 vit e 6 muaj burg edhe Vasillaq Strakoshën. Për shkak të gjykimit të shkurtuar, dënimi iu reduktua në 1 vit heqje lirie. Strakosha nuk do të shkojë në burg, pasi gjykata vendosi pezullimin e dënimit dhe vendosjen e tij në 2 vite shërbim prove. Edhe ndaj tij u mor masa plotësuese e ndalimit për të ushtruar funksione publike për 5 vite.
Goro dhe Strakosha u shpallën fajtorë për veprën penale të shpërdorimit të detyrës.
Goro u mor i pandehur për shpërdorim detyre në bashkëpunim me ish-drejtorin e tokës dhe menaxhimit të pronës të bashkisë Himarë Vasillaq Strakosha.
Hetimet nisën pas kallëzimit të Fredi Belerit, i cili akuzoi Goron se në vitin 2016 ka tjetërsuar një sipërfaqe prej 4,263 metra katrorë tokë duke ia kaluar Arqile Bollanos, i komanduar si pasues në krye të Bashkisë Himarë.
Kjo është hera e dytë që Goro cilësohet fajtor dhe dënohet nga gjykata. Më herët ai është dënuar për tjetërsimin e pronës mbi të cilin Artan Gaçi bashkëshorti i ish-ministres së Jashtme Olta Xhaçkës ndërtoi investimin strategjik prej miliona euro në fshatin Gjilekë.
