GJKKO ka dënuar me 12 vite burg Emiljan Burbën, i njohur si miku i Aldo Bares, pasi akuzohet për trafik droge në kuadër të një grupi të strukturuar kriminal.
Emiljan Burba u shpall fajtor për veprat penale “Trafikimi i lëndëve narkotike” kryer në formën e veçantë të bashkëpunimit, atë të grupit të strukturuar kriminal, “Kryerja e veprave penale nga organizata kriminale dhe grupi i strukturuar kriminal”, dhe “Grup i strukturuar kriminal”.
Ai u dënua me 12 vite burg, por do të qëndrojë pas hekurave vetëm 8 vite pasi përfitoi nga gjykimi i shkurtuar.
“Në zbatim të nenit 406/1 të Kodit të Procedurës Penale, të pandehurit Emiljan Sofo Burba, i ulet 1/3 (një e treta) e dënimit të dhënë, duke u dënuar përfundimisht me 8(tetë) vjet burgim”, thuhet në vendimin e GJKKO.
Vuajtja e dënimit nga i pandehuri Emiljan Sofo Burba do të kryhet në një burg të sigurisë së lartë.
Njoftimi:
Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Dërgimin në gjyq të çështjes nr. 159, të vitit 2024, me të të pandehur Emiljan Burba, i akuzuar për kryerjen e veprës penale të “Trafikimit të narkotikëve”, në bashkëpunim në formën e grupit të strukturuar kriminal, “Grupit të strukturuar kriminal”, parashikuar nga nenet 283/a/1, 28/4, 333/a/1 dhe 334/1 të K.Penal”.
