Gara për zgjedhjen e drejtorit të ri të përgjithshëm të Policisë së Shtetit po hyn në fazën përfundimtare dhe këtë të martë kandidatët u paraqitën për intervista në Ministrinë e Brendshme, në një proces që është ndjekur me interes të veçantë edhe nga partnerët ndërkombëtarë.
Seancat dëgjimore u zhvilluan me dyer të mbyllura dhe pa praninë e mediave. Komisioni që drejton procesin kryesohet nga zv.ministrja e Brendshme, Silva Caka, dhe përbëhet gjithashtu nga sekretarja e përgjithshme e ministrisë dhe drejtori i AMP-së.
Në total u intervistuan 14 kandidatë, të cilët u paraqitën sipas rendit alfabetik dhe prezantuan platformat e tyre për drejtimin e Policisë së Shtetit, ndërsa anëtarët e komisionit u drejtuan pyetje mbi prioritetet dhe vizionin e tyre.
I pari që u paraqit para komisionit ishte drejtori aktual i Policisë së Durrësit, ndërsa më pas vijuan kandidatët Alfred Çepe dhe Arjanit Arapi. Në listë ishte edhe drejtori aktual i Policisë së Vlorës, Elidon Çela, i konsideruar nga shumëkush si një nga kandidatët potencialë për drejtimin e policisë.
Në garë janë edhe emra të tjerë si Gentian Berberi, Gentjan Shehaj, Idajet Faskaj, Lorenc Panganika dhe Neritan Nallbati. Një nga figurat që shihet me interes edhe nga partnerët ndërkombëtarë është Pëllumb Seferi, drejtori i Departamentit të Marrëdhënieve Ndërkombëtare.
Intervistat vijuan më tej me kandidatët Rebani Jaupi, Saimir Boshnjaku dhe Skënder Hitaj, ndërsa i fundit që dha intervistën ishte ish-drejtori i Policisë së Tiranës, Tonin Vocaj.
Procesi u ndoq nga afër nga përfaqësues të ICITAP dhe EU4LEA, ndërsa gjatë zhvillimit të intervistave në Ministrinë e Brendshme u panë edhe përfaqësues të ambasadës britanike. Po ashtu, e ngarkuara me punë e Shteteve të Bashkuara në Tiranë, Nancy VanHorn, zhvilloi një takim me ministrin e Brendshëm Besfort Lamallari.
Interesi i partnerëve ndërkombëtarë për këtë proces vjen në një moment të ndjeshëm për drejtimin e Policisë së Shtetit, pas largimit të ish-drejtorit Ilir Proda, me të cilin prej muajsh nuk kishte më kontakte zyrtare.
Sipas procedurës, brenda 48 orëve komisioni do të bëjë vlerësimin me pikë të kandidatëve dhe do t’i dorëzojë Ministrit të Brendshëm listën me pesë emrat më të vlerësuar. Më pas, ministri do t’i propozojë Këshillit të Ministrave kandidatin përfundimtar për miratim në mbledhjen e qeverisë.
