Alarm në autoritetet portuale në orët e para të mëngjesit, pas fundosjes së një anijeje mallrash me flamur të Vanuatus, e cila u përplas në një zonë shkëmbore në veri të ishullit Andros.
Anija, që ishte nisur nga Shqipëria drejt Ukrainës duke transportuar rreth 8 mijë tonë sodë, pësoi dëmtime të rënda pas përplasjes me shkëmbinjtë, çka çoi më pas në fundosjen e saj.
Në bord ndodheshin nëntë anëtarë ekuipazhi, tetë shtetas turq dhe një nga Azerbajxhani. Të gjithë u shpëtuan me sukses gjatë një operacioni të Gardës Bregdetare.Dy prej marinarëve u nxorën nga deti nga një mjet lundrues i autoriteteve, ndërsa shtatë të tjerët u gjetën dhe u evakuuan nga një zonë e vështirë shkëmbore në Andros.
Të shpëtuarit u transportuan të sigurt në portin e ishullit dhe, sipas informacioneve të para, janë në gjendje të mirë shëndetësore. Në zonë po operojnë disa mjete të Gardës Bregdetare, ndërsa në ndihmë kanë shkuar edhe anije të tjera që ndodheshin aty pranë, si dhe një helikopter i Forcave Ajrore.
Kushtet e motit në zonë ishin të mira, gjë që ndihmoi ndjeshëm në shpëtimin e suksesshëm të ekuipazhit. Shkaqet e aksidentit po hetohen nga autoritetet përkatëse.
