Prokuroria e Posaçme ka mundur të sigurojë dëshminë e dy të penduarve të drejtësisë, të cilët kanë rrëfyer dhjetëra episode të trafikut të drogës nga Amerika e Jugut drejt vendeve të BE-së dhe Shqipërisë. Njëri prej të penduarve është shtetas shqiptar, ndërsa tjetri, sipas burimeve, është shtetas i huaj.
Bëhet fjalë për megaaksionin e SPAK për sekuestrimin e një sasie të madhe kokaine në Frakull të Fierit, ku u arrestua ish-kryekomunari Viktor Cervanaku dhe disa shtetas të tjerë. Në atë kohë, në Frakull u zbulua një laborator për përpunimin e kokainës dhe në kërkim u shpall edhe një shtetas kolumbian, i cili do të bënte ndarjen e drogës.
Më vonë, në kuadër të së njëjtës dosje, u zbërthyen edhe dy grupe kriminale dhe, krahas arrestimeve, u shpallën në kërkim disa persona të tjerë. Dy të penduarit i kanë dhënë hetuesve të BKH-së detaje për rrugët e trafikut.
Hetimet e mëtejshme të SPAK pritet të sjellin goditje të grupeve të tjera të narkotrafikut, por edhe sekuestrim të miliona eurove të siguruara nga trafikimi.
