Gjykata Kushtetuese vendosi unanimisht të rrëzojë kërkesën e ish-kreut të Autoritetit Rrugor Shqiptar, Evis Berberi, për shfuqizimin e masës së sigurisë “arrest në burg”, duke vlerësuar se të treja shkallët e gjyqësorit kishin vendosur në përputhje me ligjin, ndërsa nuk shqyrtoi pjesën që lidhej me papërdorshmërinë e të dhënave të siguruara nga celularët e tij që u sekuestruan në banesën e ish-zyrtarit pas arrestimit në 2024.
Gjyqtarët kushtetues e shqyrtuan kërkesën e Berberit në seancë mbi bazë dokumentash dhe vlerësuan se ai duhet të vijojë të qëndrojë nën masën e “arrestit me burg”, pasi gjatë caktimit të kësaj mase si GJKKO, Apeli i Posaçëm dhe Gjykata e Lartë kanë disponuar në përputhje me ligjin.
Në parashtrimet e paraqitura në Kushtetuese, njeriu më i besuar i ish-zëvendëskryeministres Belinda Balluku, pretendonte përdorshmëri të mesazheve të zbuluara në celularët e sekuestruar që shërbyen si indicie për të nisur hetimet ndaj ish-zyrtares dhe kryebashkiakut të Shkodrës Benet Beci e disa të pandehurve të tjerë. Por GJK konstatoi se Berberi nuk e kishte kundërshtuar në gjykatë vendimin për sekuestrimin e celularëve dhe për momentin të dhënat e grumbulluara shërbejnë si provë në proceset penale ndaj Ballukut e të tjerëve.
Belinda Balluku po hetohet për abuzime me tenderat pas zbulimit të mesazheve të shkëmbyera me Berberin, komunikime që u zbuluan pas arrestimit të ish-kreut të ARRSH-së në 2024. Ish-numri dy i qeverisë akuzohet se në bashkëpunim me Berberin dhe ish-vartës të saj kanë paracaktuar të paktën 11 tendera, deri më tani, vlera e të cilëve shkon në miliona euro. SPAK u rrëzua nga maxhoranca në përpjekjen për të marrë leje për arrestimin e Ballukut, ndërsa ndaj kësaj të fundit janë në fuqi dy masa: pezullimi nga ushtrimi i funksioneve dhe ndalim për të dalë jashtë vendit.
