Ndaj Erzen Ukës dhe Julian Cumrakut, të dyshuar për akte ekstremiste, prokuroria ka zyrtarizuar deri tani vetëm akuzën për armëmbajtje pa leje. Ende nuk ka siguri lidhur me qëllimin dhe arsyen e pranisë së tyre në banesën ku u gjetën armë, municione, si dhe një flamur i ISIS-it i varur në mur, banesë në të cilën ata qëndronin prej të paktën disa javësh.
Duket se kanë marrë përgjigje pretendimet e Policisë se nga brenda kullës në Orosh të Fushë-Arrëzit është qëlluar me armë në momentin kur efektivët e Komisariatit të Pukës u bënin thirrje për dorëzimin e Erzen Ukës (Hamza Uka) dhe Julian Cumrakut (të njohur ndryshe si Hamza Uka dhe Adem Cumraku). Ekspertët kriminalistë të angazhuar në hetimet e operacionit “Oroshi” kanë konstatuar mbetje baruti në duart dhe rrobat e Ukës, një ish-komando me eksperiencë ushtarake në Irak dhe Afganistan gjatë viteve 2000, i konvertuar më pas në një mysliman radikal dhe ithtar të ISIS-it.
Të paktën një plumb i qëlluar nga brenda banesës është fiksuar gjatë kqyrjes së vendit të ngjarjes, pas vetëdorëzimit të Ukës dhe Cumrakut.
Policia e Shtetit nuk ka sqaruar ende rrethanat e plagosjes së Erzen Ukës, i cili pas dorëzimit u transportua në spitalin rajonal të Shkodrës me një plagë plumbi në këmbën e djathtë. Avokati i tij hedh dyshime se plaga është shkaktuar nga forcat RENEA, pretendim që deri tani policia e ka mohuar.
Dyshimet ndaj tyre nisën rastësisht, gjatë një operacioni anti-kanabis të Policisë së Pukës, kur Julian Cumraku u largua me shpejtësi nga vendngjarja dhe u ngujua në kullën ku më pas rezultoi se ndodhej edhe Erzen Uka, i dënuar më parë me tre vite burg për akuzën e “nxitjes së urrejtjes fetare”.
