Ervin Mata, i njohur edhe me nofkën “Boli i kokainës”, është arrestuar në Brazil. Ai rezulton i shpallur në kërkim ndërkombëtar nga SPAK për përfshirje në trafikun e sasive të mëdha të kokainës dhe drejtim të një grupi të strukturuar kriminal që vepronte në disa shtete.
Sipas të dhënave hetimore të SPAK, Mata dyshohet si një nga organizatorët kryesorë të një rrjeti ndërkombëtar që trafikonte kokainë nga Amerika Latine drejt Europës, përmes rrugëve që përfshinin Brazilin, Kolumbinë dhe vende të BE-së si Spanja, Gjermania dhe Holanda. Në dosjet hetimore përmenden disa episode trafiku me sasi të mëdha droge, përfshirë qindra kilogramë kokainë të sekuestruara në operacione të ndryshme ndërkombëtare.
Autoritetet braziliane kanë lëshuar urdhër-arrest ndaj tij pas kërkesës për ekstradim të paraqitur nga Shqipëria, ndërsa çështja po shqyrtohet nga Gjykata e Lartë Federale në Brazil. Ai konsiderohet si një nga personat kryesorë të dosjes së SPAK për krim të organizuar dhe trafik ndërkombëtar droge.
Ndaj tij rëndojnë akuza për trafik droge dhe pjesëmarrje në organizatë kriminale, ndërsa hetimet ndërkombëtare vijojnë në bashkëpunim me Interpol dhe autoritetet e vendeve të ndryshme europiane.
Njoftimi i plotë i policisë
Policia e Shtetit/Si rezultat i partneritetit të ngushtë me homologët dhe me agjencitë ligjzbatuese ndërkombëtare, finalizohet një tjetër fazë e operacionit “The Wanted”.
Akuzohet se koordinoi pjesëtarët e grupit kriminal ku bënte pjesë, për trafikimin e 240 kilogramëve Kokainë, arrestohet në Brazil, 39-vjeçari.
39-vjeçari fshihej në Brazil, duke përdorur dokumente identifikimi angleze, të falsifikuara.
Grupi kriminal, me veprimtari në Shqipëri, Amerikën e Jugut dhe Europë, u hetua në kuadër të një procedimi penal të SPAK, në vitin 2023, në bashkëpunim me EUROJUST, EUROPOL dhe agjencitë ligjzbatuese të 6 shteteve.
Si rezultat i shkëmbimit dhe koordinimit të informacioneve, në kohë reale, ndërmjet specialistëve të Drejtorisë së Interpolit dhe homologëve të Interpol Brasilias, në kuadër të operacionit ndërkombëtar të koduar “The Wanted”, u kap në Brazil, shtetasi shqiptar, i shpallur në kërkim ndërkombëtar, E. M., 39 vjeç.
Gjykata e Posaçme e Shkallës së Parë për Korrupsionin dhe Krimin e Organizuar, në vitin 2023, i ka caktuar këtij shtetasi, masën e sigurisë “Arrest në burg”, për veprat penale “Trafikimi i lëndëve narkotike”, kryer në kuadër të grupit të strukturuar kriminal, dhe “Kryerja e veprave penale nga organizata kriminale dhe grupi i strukturuar kriminal”.
Në vitin 2023, gjatë një procedimi të regjistruar nga SPAK, janë kryer hetime, në bashkëpunim me EUROJUST, EUROPOL dhe me agjencitë ligjzbatuese belge, franceze, holandeze, gjermane, braziliane dhe kolumbiane, lidhur me disa shtetas shqiptarë të përfshirë në veprimtari kriminale në Shqipëri, Amerikën e Jugut dhe në disa shtete europiane.
Gjithashtu hetime janë kryer dhe në lidhje me disa ngjarje kriminale të mëparshme, të ndodhura në Shqipëri.
Në kuadër të këtij procedimi, shtetasi E. M. dyshohet se ka koordinuar bashkëpunëtoret e tij, për trafikimin e 240 kg lëndë narkotike Kokainë, më datë 29.09.2020.
39-vjeçari u kap në qytetin e Ilha Bela, dhe kishte në përdorim dokumente identifikimi angleze, të falsifikuara.
Interpol Tirana vijon të bashkëpunojë me Interpol Brasilia, për të finalizuar procedurën për ekstradimin e shtetasit E. M., në Shqipëri.
Në Shqipëri, ai është në kërkim që nga viti 2023, si pjesë e një grupi të strukturuar kriminal të goditur nga SPAK.
