Pas firmosjes së tetë masave sigurie për anëtarët e grupit kriminal brenda AKSHI-t, me urdhër të SPAK u ushtrua kontroll në disa banesa dhe u sekuestruan disa celularë të bashkëpunëtorëve me të ngushtë të Mirlinda Karçanaj dhe biznesmenëve Ergys Agasi e Ermal Beqiri. Këta dy të fundit janë shpallur në kërkim, pasi ndaj tyre është caktuar masë sigurie “arrest me burg”.
Me kërkesë të SPAK, Gjykata e Posaçme ka miratuar kërkesat për kontroll personal dhe të banesës për shtetasit Gëzim Toska, Renato Hristiç, Elon Ciko, Elgerti Bixha, Kreshnik Tërnova, Arjola Koromani, Endri Merkaj, si dhe subjektit “Merkaj 3”.
Gjithashtu ka urdhëruar “lejimin e kontrollit të banesës dhe kontrollit personal, të shtetasve, Ermal Beqiri, Ergys Agasi, Erjon Ismaili, Mirlinda Karçanaj, Hava Delibashi, Andis Papa, Gëzim Hoxha, Rogers Rryta”. Për këta shtetas ka masa sigurie nga arresti me burg deri në ndalim për të dalë jashtë vendit. “Për personat ndaj të cilëve do të ushtrohet kontrolli, të lejohet sekuestrimi i sendeve/objekteve me interes për hetimin, si aparate celularë të përdorur apo poseduar nga ata, dokumente të tjera shkresore apo sende si shuma monetare, pajisje kompjuterike apo dhe sende të tjera me interes për hetimin, të cilat mund t’i përkasin veprës penale”, thuhet në vendim.
