Elvis Roshi, ish-kryetar i Bashkisë së Kavajës paraqitet në SPAK për të marrë njoftim për zgjatjen e afateve të hetimit. Ai është marrë i pandehur nga Prokuroria e Posaçme për akuzën e shpërdorimit të detyrës.
Hetimi ndaj Roshit ka nisur pas një kallëzimi të Këshillit të Lartë të Shtetit, i cili gjatë një auditimi të viteve 2013–2014, periudhë kur ai drejtonte bashkinë, konstatoi një sërë shkeljesh në sektorin e urbanistikës dhe në procedurat e prokurimeve publike. Sipas raportit të KLSH-së, këto parregullsi kanë shkaktuar një dëm ekonomik prej rreth 33 milionë lekësh.
Ish-kryebashkiaku është paraqitur disa herë në SPAK për t’u pyetur lidhur me këtë çështje, ndërsa më herët Gjykata e Durrësit ka pushuar një procedim penal ndaj tij për akuza të ngjashme.
Pas zgjedhjeve të 11 majit, Roshit iu sekuestrua edhe telefoni celular, si pjesë e një hetimi tjetër të SPAK-ut që lidhet me dyshime për krime zgjedhore.
